Tapuamisie karjalaisella mualla – Petroskoissa toimiu perintehellini etnoleiri
Petroskoissa toimiu etnokulttuurini leiri “Nuorien tapuamini karjalaisella mualla”. Perintehellini etnoleiri yhisti 25 koululaista, kumpaset opaššutah karjalan, vepšän ta šuomen kieltä. Lapšet tultih Karjalan eri piirilöistä ta Tverin alovehelta.
— Nuoret ollah hyvin motivoitunehie. Leirin šuosijo on kašvan. Tänä vuotena šaima 50 anomušta. Leiri yhisti koululaisie Puatenen kyläštä, Segežašta, Kalajovešta, Šoutjärveštä ta Petroskoista šekä Tverin alovehen Lihoslavlista, kommentoi Oma Media -portalilla etnoleirin johtaja Anna Gluškova.
Gluškova koroštau, jotta leiri auttau nuorie niise ammatinvalinnašša. Leiri motivoi lapšie jatkamah kielien opaštumista koulun jälkeh.
Muasteri-oppien ta harjottelujen aikana yläluokkalaiset tuttavuššutah karjalaisien, vepšäläisien ta šuomelaisien kulttuurih ta tapoih. Petroskoin yliopiston šuomelais-ugrilaisen kulttuurin laitokšen opaštajan vietetäh leiriläisillä interaktiivisie luventoja. Šamoin koululaiset käyväh Kižin musejošša, Karjalan kanšojen yštävyštalošša šekä Talviukon pajakyläššä Čalnašša.
Leiri vietetäh 23.–27. šajekuuta. Toimenpito on järješšetty tašavallan lapšien lisäkoulutukšen Rovesnik-keškukšešša Karjalan opaššuš- ta urheiluministerijön šekä tašavallan kanšallisen ta alovehellisen politiikan ministerijön tuvella.
Aihiešta voi lukie niise vepšäkši, venäjäkši ta šuomekši.
