Tanšši on šilta kantatuattojen viisahuošta nykymuajilmah
Tämän vuuvven kevätkuušša Udmurtijašša piettih Šilta – perintehien läpikulku -kanšainvälistä festivalie šamannimisen projektin rajoissa. Šen tavoittehena on ratkaissa šuomelais-ugrilaisien kanšojen kulttuurin šäilyttämisen proplemoja tanššin kautti. Tänä vuotena projekti voitti Presidentin fondin granttien kilpailun.
Iževskissa projektin rajoissa oli pietty Čebeläi-tanšširyhmän vuotisjuhlakonsertti. Še tuli šuurekši pruasniekakši ainutluatusen folklorin arvoštajilla.
– Jo kolmaš kollektiivien šukupolvi tänä vuotena liitty Kruuga- ta Čebeläi -tanšširyhmien väliseh yhteisruatoh. Meilä on šamoja tehtävie – kehittyä kanšallista kulttuurie, käyttyä nykyaikasie keinoja kantakanšojen folklorin elvyttämiseh. Yhtehiset projektit on hyvä mahollisuš jakua kokemušta, kerto Kruuga-kollektivin ohjuaja Svetlana Gretskaja.
Šilta – perintehien läpikulku – projektin rajoissa festivalin lisäksi pietäh seminarija ta muasteri-oppija, kumpasih kučutah spesialistija ulkomailta ta Venäjän erilaisista šuomelais-ugrilaisista tašavalloista, niijen luvušša Karjalaštaki.
Kaikki festivalih ošallistunuot lapšet ta opaštajat šuatih hyvyä tunnelmua. Hyö šäilytetäh eri kanšojen kulttuurie ta henkellisešti hyö ollah lähisie – lapšet folkloriryhmissä opaššutah ymmärtämäh ta šäilyttämäh kantatuattojen viisahutta. Heilä tanšši on šiltana muinasešta kulttuurista nykymuajilmah.
