Tamara Jufan ozuttelu: kaunehuttu taidoilijan silmin
Priäžän etnokul’tuurukeskukses on ozutettavinnu tundietun karjalazen taidoilijan Tamara Jufan kuvua.
— Tiä on ezil Tamara Jufan mualavustu, kudamat häi piirusti lahjakse Pyhärven lapsienpäivykoile 1970-vuozinnu. Tamara Grigorjevnal oldih ylen hyvät yhtevykset Pyhärven kul’tuurukoin ruadajien kel, häi kaksi kerdua luadi eskiizat sigäläzen pajojoukon konserturuuttih nähte, niidy suau nähtä ozuttelus, sanoi Priäžän etnokul’tuurukeskuksen piälikön virras olii Tatjana Seppänen Oma Mediale.
Pyhärven lapsienpäivykodi on salvas, lapset nygöi ollah školan seinis. Tamara Jufan mualavuksii vie ei ehtitty siirdiä školan tiloih.
— Etnokul’tuurukeskuksen ruadajile juohtuigi mieleh sikse aigua panna Jufan kuvat ozutettavakse, ku enämbi rahvastu voidas nähtä net, jatkau Tatjana Seppänen.
Ozutteluh jo käydih Priäžän alguškolan da lapsienpäivykoin kazvatit, Tamara Jufan mualavuksii ihailtih Pyhärven kylän rahvas, Moskovan, Piiterin, Kurskan, Pskovan linnoispäi käynyöt turistat.
Tamara Jufan kuvien ozuttelu, kudamis suau nähtä ven’alazien suarnoin pohjale luajittuloi kirjavii mualavuksii, ruadau Priäžän etnokul’tuurukeskukses pakkaskuun 31. päiväh suate.
