Vierahat Karjalan eri piirilöistä tultih tuttavuštumah pomorien ruokah, kilpailomah jiäkalaššukšešša ta ošallistumah huvituš- ta urheilutapahtumih. Festivalissa erikoista huomijuo kiinitetäh pomorilaiseh ruokakulttuurih. Kemissä šiitä tahotah luatie brändi. Festivalin rajoissa piettih issunto, kumpaseh ošallissuttih spesialistit ta pomorien ruokakulttuurin kantajat — paikalliset eläjät.
— Karjala esittäy arktista ruokakulttuurie. Tämä šuunta on oikein šuosittu ta šitä pitäy kehittyä. Festivalien tarkotukšena on valita ruokua, kummaista myöhemmin voipi esittyä ravintoloissa, šano federalisen Venäjän ruokakartta -projektin johtaja Jekaterina Šapovalova.
Tapahtumah ošallistu Karjalan piämieš Artur Parfenčikov. Hiän korošti, jotta pomorien ruoka on ainutluatuni ta vieläi tervehellini. Niise šemmosien festivalien pitämini auttau arktisien alovehien kehittämistä.
Festivalie piettih toista kertua ta tänä vuotena šen ohjelma oli šuurempi: oli järješšetty ruokalaittamisen työpaja, kumpasešša joka halukaš šai opaštuo laittamah pomorien keittijön ruokua, esimerkiksi, paistua makšapiiraita.
Festivalin toisena šuurena tapahtumana oli jiäkalaššukšen kilpailu. Tänä vuotenaš tuli yli 40 ihmistä. Kalaštajien šuurin joukko tuli Belomorskista — 13 ihmistä.
Jiäkalaššukšešša parahakši joukokši tuli Sosnovets-joukko, kumpasen jäšenet šuatih 1195 grammua kalua. Onnekkahammakši kalaštajakši valittih Sergei Terentjev Kemistä, hiän onkitti 60-grammasen kuorehen.
Miehien kešen voittajakši tuli Pavel Jelisejev, a naisien kešen — Jelena Smert’ukova.
Lapšet niise kalaššettih Vienanmerellä ta kilpailtih keškenäh omašša nominatijošša. 405-grammani kala toi voittuo Polina Rakovskajalla.
Šen lisäkši kalaštajat kilpailtih, ken rutompah luatiu jiäloukon ta ken luatiu enemmän loukkuo kolmešša minuutissa.
Kilpailujen nuorimmalla kalaštajalla oli viisi vuotta, a vanhemmalla — 70. Hyöki šuatih erikoislahjoja.