Talven aigua Karjal kazvau 400 tuhandel turistua
Ennustuksien mugah talvel Karjalah tulou 30 % turistua enämbi migu mennyt vuon. Karjalan piämies Artur Parfenčikov vihjai, ku turistuala on meijän alovehen kehityksen tärgei oza da turistoin kazvu andau ližiä varua tazavallan kukkaroh.
— Nygöi Karjalas turizmualan tulot ollah 3,7 %. Turistoin luvun kazvu on vägevy impul’su ei vaigu ekonoumiekan, ga eländykohtien infrastruktuuran kehittämizeh, sego ekolougien kyzymyksien sellittämizeh, meijän kul’tuuruperindön säilyttämizeh. Nygöi Karjalas on lähes 992 kohtua, kudamis on 21,6 tuhattu sijua turistoile. Niilöin vuoh meijän rahvas suajah ruadokohtat, suitutah verot paikallizih b’udžiettoih da on turvattu myödäh olijat palvelut, sanoi Karjalan piämies omassah lehtistöpalvelule.
Artur Parfenčikov käski jatkua ruaduo muga, ku turistua Karjalas tulis äijy ymbäri vuvven.
— Kogo vuvven turistoin käyndy turvuau Karjalan eläjile ruaduo da alallizii palkoi. Halličuksen ruado on kannattua tapahtumumatkailuu, auttua pidoloin valmistamizes, kannattua turistuobjektoin omistajii valdivon keinoloin vuoh, niilöin luvus kanzalliziengi projektoin kauti, ližäi Artur Parfenčikov.
Tulien talvikavven tapahtumien joukos ollah Pakkasukkoloin kižat Anukses, jarmanku-festivuali ”Ja-ja Kemska volost’”. Turistoin mieldy kiinnitetäh Karjalan Talviukon konnut, Priäžän piirin Halla-died’oin taloi, Ruskeala-vuoripuusto.
Tarkembah sih nähte, midä suau nähtä Karjalas talvel, täs.
Aihies voit lugie suomeksegi.
Yhty Oman Median kanualah Telegramas!
