Taidomuzein rikkahukset: rentgen pal’l’astau peittožukset
Karjalan taidomuzein erähät eksponuatat — obrazu da kaksi mualavustu — tarkastetah rentgenan vuoh. Rentgentutkimus andau mahton sanuo varmah, ongo net alguperäzet da kui niilöi pidäy restavriiruija.
Tutkittavannu toizien joukos oli Daniil-prorokan da Vieristän kaksiozaine obrazu.
— Arbuammo, ku se obrazu on mualattu 1800-luvul. Ga rentgenan luajittuu näemmö, ongo alahan vie mittuinetahto kuva. Sit restavratsien jälles myö sanommo tarkemban aijan, konzu se oli mualattu da sit allammo eččie, kuduas kirikös se konzutahto oli, sanou Oma Mediale Marija Smirnova, taidomuzein restavratsien ozaston piälikkö.
Georgii Bobrovskoin Talvi-mualavuksen piälimäzen tazon al rentgenas löydyi alembaine, kuduas oli toine kuva. A Vladimir Orlovskoin mualavustu ”Černigovan ymbäristö” tutkittuu tiedoruadajat ruvettih ebäilemäh, ongo mualavus alguperäine. Mualavustu tutkijes rodih selvy, ku luakan piäle oli luajittu liigua elementua. Ičegi mualavuksen luadijan nimikirjutus on luajittu ylembä da myöhembä, migu mualavus.
Rentgentutkimuksii mualavuksii da obrazoi tutkijes käytetäh ammui.
— Suuris muzeilois, sanommo Ermitažas, on oma rentgenlaittehisto. Meijän moizis pienis muzeilois, tiettäväine, ei, ku se on kallis. Enne moizii tutkimuksii luajimmo linnan bol’ničas da niidy luajittih pl’onkil, kuduat oldih ylen kallehet, nygöi — raudutien bol’ničas da nygyaigazel laittehistol. Ku ollou eksponattu suuri, luajitah nelli-kuuzi kuvua, sit tiedokonehel niilöis luiajitah yksi da tutkitah, jatkau Marija Smirnova.
Rentgentutkimuksien luadijoin raudutien bol’ničan liäkärilöin sanoin mugah, hyö varavozeh da huolehtijes tutkittih taidomuizen eksponuattoi, ihan muga, ku net oldas ristikanzat.
Aihies voit lugie suomeksegi.
