Täl vodel Petroskoin pedagogine kolledž pästi läz 180 pedagogad
Täl vodel Petroskoin pedagogine kolledž pästi läz 180 pedagogad, kudambiden keskes om äi školanedeližen opendusen pedagogoid (65 mest), augotižškolan (42 mest) da likundan (38 mest) opendajid. Siš tedotab Karjalan opendusen da sportan ministerstvan press-služb.
— Meiden openduzvoded oli täuttud melentartuižil da tarbhaižil azjtegoil. Kolledžas meil oli lujas äi praktikad da radod lapsidenke, erazvuiččid ajelusid, sanub Al’ona Politova, voden 2026 kolledžan “Opendamine augotižškolas” -openduzpolen pästnik.
Sügüzel Petroskoin pedagogižehe kolledžaha tuleb opendamhas enamba 170 ut openikad. Kaikid popul’arižembad openduzpoled oma “Opendamine augotižškolas” da “Školanedeline openduz” — sigä linneb 100 ut openikad (50 openikad kaikuččel openduzpolel).
Johtutam, miše kolledžaha völ voi oigeta azjbumagoid opendamižen täht.
Karjalas opendajile da pedagogoile anttas ližatuged. Ozutesikš, konz nor’ pedagog opendusen jäl’ghe radab openduzorganizacijas üks’, kaks’ da koume vot i sid’ jatktab rata sigä-žo vai toižes openduzorganizacijas ičeze special’nostin mödhe, ka hänele makstas 100 tuhad rubl’ad rahalahjaks. Karjalan valdmehišt jatkub paremboita pedagogoiden radoloid.
— Täl vodel Venäman openduzmnisterstv tegi dokumentad, miččiden mödhe tariž maksta töpaukad pedagogoile. Nece oli tehtud pohjaks meiden Ezikuvadokumentan täht. Meletam, miše pedagogoiden töpaukad pidab tehta sel’ktembikš da oiktembikš, sanub Karjalan opendusen da sportan ministr Natalja Karmazina.
“Nored da lapsed” -valdkundaližen projektan aigan Karjalas tehtas skoliden täuz’ kohenduz: vozil 2026–2027 regionas planuitas paremboita 20 školsauvotust.
Sen ližaks ičeze radod jatkub “Küläopendai” -programm, miččen abul nored pedagogad lätheba radmaha penihe lidnoihe da külihe. Karjalan nece programm radab vodelpäi 2020, i siš aigaspäi penihe eländsijoihe tuli 76 opendajad, kudambišpäi 63 radab sigä tähäsai.
Ližatedoid erazvuiččiš tugiprogrammoiš pedagogoiden täht voib sada “Bud’ učitelem” -lehtpolel.
Uzišt neciš temas voib lugeda mugažo karjalaks.
Tarkištele "Oma Median" MAX-kanalad!
