Enččed Rahvahaližen da regionaližen politikan ministerstvan radnikad saiba arvznamad sures panendas Karjalan kehitoitandaha. Heiden keskes oli Svetlana Petrovna Pas’ukova, ministerstvan radnik da aktivine vapsläine naine.
Tal’vkun lopus Rahvahaližen da regionaližen politikan ministerstvan seiniš mäni pauklahjoičend. Sergei Kisel’ov andoi enččile ministerstvan radnikoile arvznamad da sanui spasib-sanoid heiden abus, sures rados da panendas Karjalan valdkundan rahvahiden kul’turan da elon kehitoitandaha.
— Minä radoin Rahvahaližen da regionaližed politikan ministerstvas läz 13 vot. Vaiše nimi sil oli toine. Om lujas tärged, miše tämbeižed ministerstvan radnikad arvostaba enččid radnikoid, muštaba meid da kaiken küzuba nevondoid, sanui Svetlana Pas’ukova, arvostadud Karjalan valdkundan tegii.
Lähttes lebule, Svetlana Pas’ukova jatktab ičeze aktivišt radod. Nügüd’ hän om Karjalan valdkundan Karjalaižiden, vepsläižiden da suomalaižiden nevondišton ühtnik da Ministerstvan kollegijan ühtnik. Sen ližaks, Svetlana Petrovna om Vepsän kul’tursebran aktivine ühtnik.