Suurele lavale: Luodehpuoleh teatranruadajien ozutelmu Petroskois
Muailman teatranpäiviä vaste Kanzallizen teatran laval ozutettih Dostojevskoin Kaksoiskappaleh-tevoksen mugah luajitun ozutelman eskiizu. Sen on luadinuh yhtehine Ven’an luodehpuolen teatruruadajien joukko — ArtMasters Alovehet -kilvan ozanottajat. Jo 2. sulakuudu joukko ozuttau tämän spektaklin Moskovan laval kilvan loppuozas.
Spektaklin ozuttamine Petroskois oli tärgienny etuapannu joukon valmistandas. Enziozutelmu oli Kanzallizen teatran pienen laval. Sidä kaččomah kerävyi täyzi zualu, tuli gostua eri alovehilpäi.
— ArtMasters-kilbu on ylen suuri, hyvä, gu sih yhtytäh teatrualan ruadajat luodehespäigi. Kilvan tavoittehennu on eččie teatru- da kinoalah nerokastu nuorižuo. Ližäkse kehitämmö kino- da taidoalua eri alovehil. Minä ylen äijäl vuotan uuttu ezitysty. Kiitän luodehen alovehtu da Kanzallistu teatrua, gu kannatetah projektua, sanoi ArtMasters-kilvan piäjohtai Borislav Volodin.
ArtMasters-kilbu on hyvä mahto nuorile teatranruadajile suaha ainavoluadustu ruadomaltuo. Sih voijah yhtyö 18—35-igähizet rahvas. Kilbah kuulutah eri etuapat. Ozanottajile pidi työndiä pakičus pivon valmistajile, kudamas hyö sanellah omis nerolois. Parahat heis tuldih Petroskoile. Ruado Karjalan piälinnas algavui kevätkuun allus.
Finualuozutelmat pietäh Moskovas sulakuun allus. Arvostusjoukko valiččou parahan ruavon. Voittajat suajah den’gua omah ruadoh. Karjalan Kanzalline teatru voibi suaja omah ozutelmah 1,6 miljounua rubl’ua.
Yhty Oman Median kanualah Telegramas!
