Suunun koulušša korjatah alovehen enšimmäistä agroteknologista vesiviljelyluokkua
Teknologini ruokaturvallisuon turvauš -kanšallisprojektin rajoissa Jänišpuolen kylän Suunun koulušša luajitah erikoista agroteknologista luokkua. Šiitä tulou tašavallan enšimmäini kalankašvatuš- ta bioteknologijaluokka, ilmottau Karjalan tašavallan mua- ta kalataloušministerijö.
Urakkajärještöt alettih korjauštöitä koulušša kulujan vuuvven kevätkuušša.
— Tulijan agroteknologisen luokan nykyaikasen laittehiston anšijošta koululaiset šuahah opaštuo ammattie korkiella tašolla. Šuunnitelmissa on oštua interaktiivisen panelin opaššušprosessin visualisointie varoin, laboratorijan laittehie, mikroskoppija, vesitislaušaštien tutkimukšie varoin. Luokkah ašetetah akvariumi kaloilla ta šelkärankattomilla šekä opaššuštauluja ta vesibiologisie laittehie. Šamoin ašetetah vejenalsen robotiikan kompleksi, kumpasen avulla koululaiset tutkitah vesistöjä, ministerijö kertou tiijotukšeššah.
Projektin piäinvestoiččijana on Fedorenko N.V. -ošakehyhtijö. Yrityš aktiivisešti ruatau tulijien spesialistien kera ta šiännöllisešti esittelöy ammattie koululaisilla ta ylioppilahilla. Agroteknologisen luokan anšijošta ruato tulou tehokkahammakši.
Agroteknologista luokkua luajitah Fedorenko N.V. -ošakehyhtijön ta Karjalan tašavallan mua- ta kalataloušministerijön kannatukšella. Šen anšijošta ilmeštyy tulijie ruatajie vesiviljelyn alalla, kumpani aktiivisešti kehittyy Luioteis-Venäjällä.
Aihiešta voit lukie niise šuomekši.
Yhty Oman Median MAX-kanalah!
