Suomalaiž-ugrilaižes školas zavodihe vepsän kelen nedal’
Petroskoin Suomalaiž-ugrilaižes školas zavodihe tradicionaline “Vepsän kelen nedal’” -akcii. Sen aigan openikoid süvemba tundištoittas vepsän rahvahan kul’turanke. Azjtegod mäneba erasiden urokoiden sijas.
— Lapsile akcii om mel’he, sikš ku necen nedalin aigan hö saba äi melentartuižid ližatedoid vepsän rahvahas, vastasoiš tetabiden mehidenke – pajatajidenke, käzitöiden mastaridenke, lehtesen radnikoidenke, sädaimehidenke — kudambiden rad om sidotud vepsän rahvahan kul’turanke da kelenke. Lapsed nägeba, miše vepsän kel’ om tarbhaine, se kävutoittas nügüdläižes elos, starinoiči školan vepsän kelen opendai Nadežda Petrova.
Vepsän kelen nedalil likundurokoil lapsed vändaba vepsläižihe vändoihe, muzikurokoil tundištasoiš vepsän rahvahan muzikaližen kul’turanke. Paiči sidä tehtas erazvuiččed mastar’-klassad da jogapäiväižed tegendad, miččihe voiba ühtneda kaik tahtnikad ripmatomašti sišpäi, mittušt kel’t opendad školas — vepsän, karjalan vai suomen.
