Suomalaiž-ugrilaižes školas tehtihe linduižid
5. uhokud “Kibin”-kulehtesen radnikad Galina Baburova da Ol’ga Demidova vediba mastar’-klassan Suomalaiž-ugrilaižes školas 6. klassan openikoiden täht. Kaiked mastar’-klassaha ühtni 15 last.
Täl kerdal azgtedo oli omištadud linduižile. Openikad johtutiba erazvuiččiden linduiden nimid, ozaižiba ozoitesid da nimitiba lindun hibjan palad vepsän, karjalan i suomen kelil, eciba tematižid sanoid fillvordas. Nece oli kuti pen’ rahvahaližiden keliden urok. Sid’ lapsed tegiba čomitesid — ripkid: hö leiksiba kartonaspäi linduižed, a sen jäl’ghe čomin mujutiba niid, pirdiba vepsläižid znamoid da ornamentoid. Niiš ornamentoiš lapsile starinoiči Ol’ga Demidova — hän lugi lühüdan lekcijan vepsän rahvahan taidehen polhe. Jäl’gmaine hašk oli nitiden sidond.
— Tämbei mastar’-klassan tem oli “Linduižed”. Nece tem om lujas melentartuine kaikile, sikš ku pigai tuleb keväz’ i lapsed jo varastaba sidä. Mastar’-klassan vedäjad abutiba openikoile tehta hüvid linduižid, mujutada niid, pirtta niiš vepsläižid znamoid, miččid voib vastata vepsläižiš poimetišiš vai käzitehmusiš. Lapsed surenke melentartusenke tegiba necen radon, i mastar’-klassan lopus hö ozutiba ičeze käzitöd da oliba hüviš meliš. Mö tahtoim sanuda sur’ spasib hüvile sebranikoile, “Kibin”-kulehtesen radnikoile, i toivom, miše mugoižed vastused tehtas enamba i mö iče-ki tulem adivoihe “Periodikaha”, sanui “Oma Media” -portalale Nadežda Petrova, vepsän kelen opendai Suomalaiž-ugrilaižes školas.
“Kibinan” jubileivoden aigan sen radnikad vedäba mastar’-klassoid kut erazvuiččiš školiš, muga ičeze toimištos-ki. Nece mastar’-klass oli jo toine jubileiserijas.
Tarkištele "Oma Median" Telegram-kanalad!
