Suomalaiž-ugrilaižes školas mäni “Lönnrotan lugendad” -konferencii
17. sulakud Petroskoin Suomalaiž-ugrilaižes školas mäni tradicionaline “Lönnrotan lugendad” -tedokonferencii. Jo 20 vot nece azjtego abutab popul’arizoitta karjalan, suomen da vepsän kelid, kodiröunan istorijad da kul’turad openikoiden keskes, a mugažo tugedab etnokul’turišt opendust Karjalas. Jubileikonferencii oli omištadud Venäman rahvahiden ühtmuden vodele.
Azjtego zavottihe praznikaližel avaiduzceremonijal, miččen aigan tervhensanoidenke ezini Suomalaiž-ugrilaižen školan pämez’ Natalja Barkalova. Hän sanui, miše nügüd’ ühthižtö da oppind oma ani tärktad — ned abutada openikoile čukloutas Karjalan kul’turaha, kehitoittas da kosketadas toine toiženke. Ceremonijad čomitiba muzikezitused: opendai i rahvahidenkeskeižiden konkursoiden laureat Tatjana Trunova vändi kantelel, “Lastenpiiri”-hor (ohjandai Marina Pavlova) pajati folk-rok-kompozicijad. Sen ližaks Prezidentan kadetopišton kantelistoiden ansambl’ (ohjandai Jelena Kubinec) vaumišti adivoiden täht čoman muzikprogramman.
Ceremonijan jäl’ghe zavodihe sekcijoiden rad. Konferencihaja voiba ühtneda 1.—11. klassoiden openikad, a mugažo lapsiden päivkodiden kazvatajad i pedagogad. Nored oppijad eziniba mugoižiš nominacijoiš: “Kul’turjäl’gestuz”, “Ezitatoiden eläb sana”, “Ezmäižed haškud tedoho”, “Kodirandan istorii”, “Kel’tedo”, “Avaidusiden kaleidoskop”, “Karjalan mehed”, “Kalevalan” henged taidehes” da “Tundištagatoiš. Nece om projekt!”. Mugažo oli eriline “Karjalaine jarmark” -nominacii, a pedagogoiden täht oli vaumištadud openduzmahtoiden konkurs “Kalevalan” čoma mir” -nimel. Vägestajad valitadihe kaikuččes nominacijas.
“Lönnrotan lugendad” -tedokonferencijaha ühtni “Kipinä”-kulehtesen pätoimitai Jana Filimonkova — hän oli “Kul’turjäl’gestuz”-sekcijan žürijoukus.
— Mö jo amu radam ühtes Suomalaiž-ugrilaižen školanke, sikš olen ihastušis ühtneda neche azjtegoho. Minei om mel’he olda tägä, mugoižiden lahjakahiden da melekahiden lapsiden keskes. Heil oli ani čomad i melentartuižed projektad da oppindradod. Toivon norile tedomehile ozad da tulijoid avaidusid! Uskon, miše heiden planad todenzoittase, sanui “Oma Media” -portalale Jana Filimonkova.
Tarkištele "Oma Median" MAX-kanalad!
