Sulasiän periä Kostamukses perävyttih biatlonkilvas
Aigaine kevät da sulanuh lumi muutetah Karjalan sportuelaigua. Anna Bogalii -nimellizen suuren biatlonkilvan Kostamukses piendäs perävyttih sulasiän periä. Äijy sportumiesty da tazavallan gost’ua tahtottih tulla Karjalan pohjazen linnah 30. kevätkuudu — 6. sulakuudu. Kilvan ohjuajat valmistettih laduloi, ga siä voitti sit toras. Suksitustapahtumas perävyttih sulasiän täh.
Anna Bogalii on Ven’an kuulužu ammunduhiihtäi, kaksikerdaine olimpiuadanvoittai. Hänen nimeh kilboi pietäh äijis Ven’an linnois. Kostamukses olis vuvven jälgimäine kolmas etuappu.
— Sulasiän periä meil pidäy perävyö kilvan piendäs. Aigaine kevät da sulanuh lumi muutetah sportupluanua, ilmoitti Kostamuksen haldivo omassah VK-sivul.
Kostamuksen Suksi- da biatlonkeskus uvvistetah tänä vuon: azetetah garažu tehniekoin da ammunduvehkehien säilyttämizeh niškoi, muutetah lampoi, luajitah uuzii laduloi. Äijät iesmanittulois ruadolois on luajittu kilvah niškoi.
Aihies voit lugie suomeksegi.
Yhty Oman Median kanualah Telegramas!
