Sulakus mäneb “Saneluz karjalan da vepsän kelil” -akcii
Karjalan rahvahaližen da regionaližen politikan ministerstv ühthižrados Rahvahiden sebruden kodinke tegeb “Saneluz karjalan da vepsän kelil” -regionoidenkeskeine akcijan. Se mäneb sulakun 20.—26. päivil, miš tedotadas Ministerstvan oficialižel VKontakte-lehtpolel.
Vodel 2026 akcii om omištadud Venäman rahvahiden ühtmuden vodele da Vladimir Jegorovič Brendojevan sündundpäivän 95-voččele jubilejale.
— Kut i tobjmalaz, akcijaha voiba ühtneda Karjalan Valdkundan da Piterin, Tverin i Vologdan agjoiden eläjad. Planuitas vaumištada enamba 70 kirjutamižen sijad, no kirjutada sanelusen voib internetas-ki, tedotab Ministerstvan press-služb.
Sanelusen tulijoiden ühtnikoiden täht om vaumištadud tradicionaline arb, miččehe voib ühtneda Sanelusen oficialižel VKontakte-lehtpolel. Sigä-žo voib tedištada akcijan uzištod da Sanelusen kirjutamižen sijoiden adresad.
“Saneluz karjalan da vepsän kelil” -regionoidenkeskeižen akcijan pätegend om popul’arizoitta da kehitoitta Karjalan igähižiden vähäluguižiden rahvahiden kelid. Kaikutte voz’ nece akcii ühtenzoitab rahvahiden kul’turan da keliden oppijoid da navedijoid.
Uzištoid neciš temas voib lugeda mugažo karjalaks, suomeks da venäks.
Tarkištele "Oma Median" Telegram-kanalad!
