Suarnoin vuoh sovukkahah elaigah
Karjalan tazavallan lapsien kazvattajien keskes pietys kilvas, kuduan ilmoitti Karjalan opastuksen kehityksen instituuttu, voitti Kostamuksen Aurinko -lapsienpäivykoin ruadai Tamara Muntijeva. Hänen Karjalan rahvahien suarnat -kogomuksen perustehel luajittu opastusmetoudiekku on sanottu parahakse.
Sentämän kuun aloh kostamukselazet lapset kuunneltih suarnoi, kerrottih mielehpainujii juondehii, opastuttih keksimäh omii kerdomuksii, piirustettih erilazii ornamentoi. Metoudiekkuharjaitus kilbah nähte on luajittu toizen Karjalan kanzoin suarnat -kogomuksen julgavon perustehel. Sih kuulutah azerbaidžantsoin, oniegantagavozen eläjien, marilazien, tadžikoin da tatuaroin suarnat.
— Suarnoi lugijes myö lapsien kel tuttavuimmo eri kanzoin perindölöih, kul’tuuran, tiijustimmo heijän syömizih, soittimih, ruuttih nähte. Ečimmö erilažuksii da yhtevyksii. Sanommo, azerbaidžantsoin suarnas pastetah piirualoi tandir-päčis, ven’an da karjalan saurnois — suures päčis, kuduadu sanotah ”russkoi”. Azerbaidžantsoin kielisoitto on saze, se mustoittau karjalan kandelehtu da ven’an gusliloi. Lapsile oli mieleh sen tiijustua. A lapsien keskes on karjalastu, ven’alastu da toizih kanzoih kuulujua, sanoi Oma Mediale Tamara Muntijeva.
Karjalan kanzoin suarnat -kogomukseh kuulutah tazavallan eläjien kanzoin suarnat. Ilmah on piässyh kolme julgavuo. Kirjat valmistettih Karjalan opastuksen kehityksen instituutan ruadajat Kanzallizen da alovehellizen poliitiekan ministerstvan kannatuksel. Moizien kogomuksien vuoh nuorele polvele kerrotah eri kanzoin mielevytty da kul’tuurua.
Yhty Oman Median kanualah Telegramas!
