Sordavala: endizen gospitalin sijah hoteli
Sordavalan linnas kohendetah endine Ven’an saldatoin gospitali, kudai oli käytös Enzimäzen muailman voinan aigah. Rakenduksen kohendai suau varua kul’tuuruperindöh kuulujien objektoin kohendamizen programman vuoh DOM.RF-bankan kauti. Sih huavatah andua 100 miljounua rubl’ua.
Programmu ruadau vuvves 2024 algajen da andau mahton biznesmiehile suaja krediitat helpondusehtoloil da kehittiä biznessua mieldykiinnittäjis histouriellizis kohtis.
— Minuh nähte on tärgei ei vaigu kehittiä tulokastu biznessua, ga luadie oma panos ainavoluaduzien mustomerkilöin säilyttämizeh meijän muan eri kolkis, jatkua niilöin elostaivaldu, sanoi Karjalan piämiehen lehtistöpalvelule projektan investoru Jevgenii Čerkasov.
Jo on suadu varua projektan dokumentoin valmistamizeh da objektan säilyttämizen ruadoloih. Rakendukseh kohendamizen jälles avatah uuzi hoteli. Čerkasoval on kogemustu täl alal: Irkutskan linnan keskučas on kohendettu da hyvin ruadau butik-hoteli endizes baron fon Tauben talois.
Sordavalan endizen gospitalin rakendus kuuluu histouriellizien rakenduksien kogomukseh, kudai sijoitui Kuhavuorel. Vuvvennu 1901 nostettu rakendus enzimäi oli alovehen bol’ničannu. Sen nostamine on kiini liäkärin Gustav Vinteran nimes, kudai puuhizen bol’ničan palettuu kehoitti nostua kivihine rakendus arhitektoran Magnus Schjerfbeckan projektan mugah.
Uvves meedikkukompleksas oldih leikavuszualat, enzimäine Suomes vuvvennu 1908 avattu rentgenkabiniettu, puusto, kuduas oli harvinastu kazvii. Enzimäzen muailman voinan aigah da vuozinnu 1944—1948 rakendukses oli vojennoi gospitali da sanatourii.
Vuvvennu 2021 rakendus on pandu kirjoile alovehellizen merkičyksen kul’tuuruperindön yhtehizeh valdivollizeh reestrah, yhtelläh tässäh seizoi hyllätynny.
Aihies voit lugie suomeksegi.
Yhty Oman Median kanualah Telegramas!
