Erähät šouferit piettih, ku net ei anneta ruttoh ajajil ajua siiriči kohtis, kus siiriči ajandu on kielletty, toizii huolestutti, ku niilöin tyves ei ruveta kabrastamah lundu, sendäh tien liikundupuolet roitah kaijat. Signualupaččahat lijastuttuu enimät šouferit roittihes yhty mieldy: paččahat ei olla turvallizet.
Šuojun juamal 86K-228 paččahat azetettih syvyskuun lopus. Kylmykuun 3. päivänny Šuojun kyläkunnan eläjät ruvettih šeikuimah tädä heijän mieles varattavua tilandehtu omal vk-sivul.
— Pimies niilöi paččahii ei nävy, kui ei nägynyh ni tiemerkičendöi, kirjutti Maša.
— Ylen vähä tilua rodih liikundah niškoi. Kai pyöräl ajajua on jygiettävy kierdiä. A kuibo talvel rodieu, kai mieldykiinittäy nähtä, kirjutti Irma.
— Olgah ennustamattomih tilandehih “sylgiettih”, a kuibo hädätilandehet ajau kiirehellizen avun mašin libo tulipalomašin? kummeksih V’ačeslav.
Karjalan Tazavallan Avtotielöin halličukses sellitettih signualupaččahien azettamistu sil, ku vuvves 2021 algajen 1. elokuussah täl tiel oli registriiruittu kaheksa avariedu, kudualois oli kaheksa kärzijiä da niilöis kaksi alaigästy da signualupaččahat azetettih GOST:an 33151-2014 mugah.
— Tilandehes, konzu ruvetah ajamah erikoisajonevvot palajien signualutulienke da iänisignualanke, toizil šouferiloil pidäy pyzyö tieliikundan siändölöi da eistyö oigiembakse da ku pidänöy, azettuo, sellitettih Avtotielöin halličukses.
Mugaže virrallizes kirjazes halličus sellitti, ku ruadoloi signualupaččahien puhtahous da kunnos pidämizekse pietäh Valdivollizet sobimuksen hantuzis.
Jo nägymättömät reduhizet signualupaččahat pestih 4. kylmykuudu. Kolmen päivän peräs net tuaste lijastuttih da seizotah nägymättöminny jo kolmen nedälin aloh.
— Parembi tulipaččahat ezetettas tiedy pitkin, kirjutti Šuojun eläi oman kyläkunnan vk-sivul.