Semendkun praznikad: Karjala om popul’arižiden sijoiden keskes matkoiden täht
Täl vodel Karjala putui popul’arižiden sijoiden lugetišehe matkoiden täht semendkun praznikoikš. Venäman 20 regionad oma neciš lugetišes. Karjala om 13. sijal. Lugetišen tegiba “Venäman turizm”-saitan ekspertad. Siš starinoiči “RBK”-lehtezю
Statistik om tehtud adivpertiden da fateroiden pakičendan mödhe 1.–4. da 8.–11. päivikš semendkud. Ekspertoiden tedoiden mödhe, Karjalas eländsijoiden arvod oma alembad, mi toižiš Venäman regionoiš.
– Karjalas fateran kortoman arv om 3800 rubl’ad päiväs, a adivpertin kortoman arv om 11 000 rubl’ad päiväs. Lehtesen statistikan mödhe, tobjimalaz turistad eciba eländsijan koumeks öks, i keskmäras ühtes turistoiden gruppas om nel’l’ ristitud, starinoiči “RBK”-lehtez.
Piter tegihe kaikid popul’arižembaks lidnaks matkoiden täht semendkun praznikoikš. Mugažo lugetišes oma Moskva, Moskvan da Nižnii Novgorodan regionad, Tatarstan, Krasnodaran da Stavropolin agjad.
Ende “Oma Media” -portal starinoiči, miše meiden valdkundas zavodihe “Karjalan turistan kart” -projekt. Karjalan eläjad da turistad voiba sada tagazmaksud (kešbekad), konz maksaba “MIR” -bankkartal valdkundan erasiš turistižiš holitesiš. Tagazmaksun suruz’mär om 10 procentad.
Uzišt neciš temas voib lugeda mugažo suomeks.
