”Sattuma” ezineb muzikaližel festivalil Velikii Novgorodas
Velikii Novgorodas mäneb ”Sloviša”-muzikaline festival’, miččele tuleba muzikantad da etnomuzikologad Venäman 20 regionaspäi da Kazahstanaspäi.
”Sloviša” mäneb 11.—13. elokud. Sen programmaha mülüba konferencii, lekcijad-prezentacijad, mastar’-klassad, käzitöiden mastariden jarmark da muzikaližiden sebroiden ezitused. Ezmäižen festivalin päivän lopib ”Sattuma”-sebr Karjalaspäi.
— Nece om ”Sattuman” jubileivoz’, sikš kacmata sihe, miše nügüd’ meiden sebran ühtnikad eläba erazvuiččiš sijoiš, konz om voimuz, naprim tehta koncertoid. Egläi olim sijaližel televidenijal, starinoičim ”Sattumas” da keliš, mičcil pajatam pajoid. Tämbei festivalil meile anttihe časun ezitusele, sanub sebran ohjandai Arto Rinne.
”Sloviša”-festivalin pätegendan om vanhoiden vändimiden popul’arizoitand. Festivalin simvolan om vižjäntkižed liranvuiččed gusl’ad, miččid löutihe Velikii Novgorodas vodel 1978. Vändimehe oli vesttud sana ”Sloviša”. Nece kirjutez andoi-ki nimen festivalile. Se pidetas tetaban tedomehen da muzikantan Vladimir Povetkinan muštoks.
Festivalil karjalaižiden karguiden mastar’-klassan vedäba Jevgenii da Natalja Mihailovad Petroskoišpäi. Mugažo hö starinoičeba festivalin ühtnikoile kanteliš. Tärktembad programmad voib kacta tägä.
