Tänäpiänä Mordvan valtijon kanšallisešša draamateatterissa starttasi Alovehien välini Venäjän Federatijon šuomelais-ugrilaisien kanšojen intellektualisen luomistyön festivali.
— Festivalin tehtävänä on Venäjän Federatijon kanšojen etnokulttuurini, henkellini ta intellektualini kehityš. Šamoin meijän tarkotukšena on löytyä uušie luovie kirjailijie, kumpasie kiinnoštau nykyaikani kaunokirjallisušprosessi, koroššettih avajaisissa festivalin järještäjät.
Festivalin ošanottajina ollah šuomelais-ugrilaisien ta samojedikanšojen etuštajat Venäjän eri alovehilta, kumpaset luuvvah luomistevokšie omilla muamonkielillä ta kiännetäh niitä venäjäkši. Karjalan tašavaltua festivalissa etuššetah Kielen, kirjallisuon ta istorijan instituutin tietomiehet Valentina Mironova ta Natalja Čikina šekä Oma Mua -lehen piätoimittaja Maikki Spitsina.
— Festivalin ohjelma on hyvin monipuolini. Šiih kuulutah paneelikeškuštelut kanšallisien kirjailijien koulutukšešta Venäjän Federatijošša, runojen ta prousan luomisella omissetut muasteri-opit, seminarit alottelijilla kirjailijilla ta runoilijilla. Varmašti kahešša päiväššä šuamma tietyä äijän hyövyllistä ta mukavua, mitä voimma käyttyä šiitä omašša luomistyöššä, šano Valentina Mironova.
Intellektualisen luomistyön festivalin järještäjänä on Venäjän Federatijon šuomelais-ugrilaisien kanšojen liitto Kanšallisukšien aseita hoitajan federalisen toimiston kannatukšella.