Saransk varastab adivoid Venäman erazvuiččiš polišpäi
Mordovijan pälidnas mäneb II Ühthižvenäman Suomalaiž-ugrilaižiden rahvahiden forum. Sen nimi om ”Venäman etnokul’turine äjüz’”.
Foruman päteman linneb etnokul’turižen kehitoitandan perspektivad norišton rados. Karjalaspäi Saranskaha lähteb delegacii: Karjalan Kelen, literaturan da istorijan institutan radnik Aleksandra Rodionova, Karjalan Rahvahaližen teatran artist Aleksandra Aniskina, Karjalan televidenijan rahvahaližen toimišton radnik Anastasia Šestak, ”Viena”-sebran pämez’ Julia Filippova da ”Suomalaiž-ugrilaižen rahvahiden liga”-sebran pämez’ Anna Anhimova.
— Edel sekcijoiden radod, plenarižel ištundal starinoičen ičein ezituses suomalaiž-ugrilaižen reginoiden parahimiš norišton projektoiš. Ezitan Karjalan projektoid neciš poles. Tahtoim äjan pagišta neniden regionoiden norišton ühthižrados, sanub Anna Anhimova.
Mugažo Foruman radon aigan tehtas II Ühthižvenälaižen parahimiden norišton projektoiden ühthevedod, a lopiše Forum ”Mö olem ühtes”- Ühthižvenälaižen rahvahaližiden kul’turiden norišton festivalil.
Johtutam, miše ezmäine ”Venäman etnokul’turine äjüz’” -suomalaiž-ugrilaižiden rahvahiden forum mäni Iževskas. Se pättihe tehta kerdan kahtes vodes, AFUN:an Nevondišton Prezidiuman ištundoiden keskes.
