“Sansarua” laulettih karjalakši
Verejä-yhtyvehen Vkontakte-šivulla on julkaistu musiikkivideo, missä yhtyvehen laulajat esitetäh Basta-räppärin Sansara-lauluo karjalan kielen livvin murtehella.
Še on esimerkki, kuin voipi yhistyä kieltä ta iänijä, šekä musiikin eri lajija ta tyylijä, jotta tulis huomattava tuloš. Še on yrityš rikkuo rajua, esittyä uutta kuoromusiikkie karjalan kielellä ta antua šillä uutta iäntä.
— Kaikešta vaikeimpana oli löytyä laulun tekstin kiäntäjän. Šentäh kun nykyaikasie tekstijä on vaikie kiäntyä kantakanšojen muamonkielillä niin, jotta šäilyttyä merkityštä. Tehtävän luati kieliaktivisti Natalja Antonova. Šiitä piti, jotta šanat šovittais ritmillä ta Ksenija Kogan valmisti musiikin šovitukšen kuorolla, šelitti musikantti Natalja Šamrai.
Nykyaikasien laulujen uuvveštah laulamini muamon kielellä on kielen šäilyttämisen yksi parahista keinoista. Laululla oli kuvattu musiikkivideo, šeki antau kaččuo kieleh uuvvešta näkökulmašta. Video jo kačottih yli šata tuhatta ihmistä. Šitä voipi löytyä #Basta_Верея heštegin mukah Vkontakte-sosialiverkošša.
