Sanelun karjalan da vepsän kielel kirjutti 1200 hengie
Tämän vuvven sanelut karjalan da vepsän kielel oldih omistettu Ižänmuallizen voinan voiton 80-vuozipäiväle.
Aktsii oli pandu rattahile 21. sulakuudu. Petroskoin valdivonyliopiston kirjaston zualah kerdyi lähes 70 hengie, kuduat kirjutettih sanelun karjalan da vepsän kielel. Heijän joukos oli yliopastujua da školaniekkua, tiedo- da taidoalan ruadajua, yhteiskunnallizih liittoloih kuulujua da joukkoviestimien ruadajua. Oligi niidy, ket vaste alletah karjalan da vepsän kielen opastumistu.
— Tämä aktsii on ylen tärgei karjalan da vepsän kielen kehittämizekse. Kai, ket yhtyttih sanelun kirjuttamizeh, voidin terendiä omii kielineroloi. Hyvä on, ku saneluloin tekstoikse on otettu karjalazien kirjuttajien tevoksien palazii, sanoi Oma Mediale Valentina Mironova, Karjalan Rahvahan Liiton johtokundah kuului.
Seiččemen päivän aloh saneluu kirjutettih Karjalan tazavallan eri piirilöis, Tverin, Piiterin, Voulogdan da Murmanskan alovehil. Kaikkiedah aktsieh yhtyi lähes 1 200 hengie.
Tänä vuon Sanelu karjalan da vepsän kielel -aktsien pidäjänny oli Karjalan Rahvahan Liitto Karjalan tazavallan piämiehen grantufondan da Kanzallizen da alovehellizen poliitiekan ministerstvan kannatuksel.
Aihies voit lugie vepsäkse, suomekse da ven'akse.
