Sanelu karjalan da vepsän kielel yhtistäy rahvastu
Karjalan da sen rinnal olijoin alovehien eläjät tarkastettih omua kielineruo. Aktsien aijakse valmistettih 75 sanelun luvendupaikkua, pidoh yhtyi enämbi 1200 hengie.
Karjalan da vepsän kielen kirjaimikot hyväksyttih 20. sulakuudu vuvvennu 1989. Aktsii pandih rattahile juuri sinä keviänpäivänny Petroskoin valdivonyliopiston tiedokirjastos. Sanelun piälimäzes piendypaikas karjalan kielen kolmel murdehel da vepsän kielel sanelun kirjuttamizen neruo tarkasti 60 hengie, kudamien keskes oli studentua, školan opastujua, kul’tuurualan ruadajua da muudu rahvastu.
— Minä otan ozua sih tapahtumah jo tostu kerdua. Se on ylen hyvä, gu kaikin voijah kirjuttua saneluu kanzallizil kielil. Saneluh niškoi oli vallittu karjalan kirjuttajan Vladimir Brendojevan tekstu. Sidä oli jygei kirjuttua, ga se oli mieleh, sanoi Oma Mediale Petroskoin valdivonyliopiston opastui Marija Savander.
Sanelun vuoh opitah kiinnittiä rahvahan huomavuo vähäluguzien kanzoin kielih. Nengozet pivot kannatetah da säilytetäh kieliperindölöi. Aktsien valmistajat kiitetäh kaikkii, ken löydi aigua tulla kirjuttamah saneluu.
Yhty Oman Median kanualah MAX:as!
