Kiži-muzein tilois Kiirovan pihal 31.pakkaskuudu Otkritije fondi -erspozitsies rubei ruadamah uuzi ozuttelu ”Radkolje-suaren vahnanaigaine pyhäkkö”. Ozuttelus suau nähtä “Kižin” tiedoruadajien tutkimusainehistuo, kudai on kerätty Kižin suariston Radkolje-suarel. Tutkijoin mieles ennevahnas täl kohtal oli saamelazien pyhäkkö.
— Radkolje-suardu tutkijat tiettih kohtannu, kus kerättih folklouruainehistuo. Konzu alloimmo arheolougizii kaivamizii, emmo voinnuh uskuo, ku lödyy moine vahnu kul’tuurien tazo — 5 tuhattu vuottu enne meijän aijan luguu. Se oli meile suuri yllätys, sanou Oma Mediale arheolougu Igor’ Melnikov, Kižin muzein vahnin tiedoruadai.
Ozutteluh tulluot suajah nähtä arheolougizien kaivamizien aigah löyttylöi vehkehii, kuduat kuulutah kivikavven aigah, sego suarel luajittuloi kiviobjektoin fotokuvii. Paikallizil eläjil XX vuozisuan allus oli uskomustu da perindyö, kuduat oldih kiini nämmih kivilöih, da net ollah syväl meijän muan histouries.
— Radkolje-suarele Iivanan päiväkse kerävyttih nuoret kaikis lähembäzis kylis, kuduat ollah Kižin suaristos. Nuoret piettih iluo — poltettih tulirobl’oloi, kižattih. Nuoret brihat ozuttajen omua vägie lykittih Oniegah suurii kivilöi. Radkoljen suuri kivi — idolu — on moine suuri, ku sidä niken ei voinnuh mukeldua vedeh, jatkau Kižin muzein ruadai Igor’ Melnikov.
Radkolje-suarel tutkimuksii da kaivamizii allettih 2000-luvun allus. Kaivamizien da tutkimusmatkoin aigah löyttylöi pannah ozutettavakse vaste nygöi.