Ruskeala Symphony: ohjelmašša kahekšan erityylistä konserttie

Tänäpiänä kello 16.00 Ruskeala-kallivopuiston Italijalaisešša kanjonissa šuau ihual’l’a ALASH-ryhmän tuvalaisie šävelmie. 6+ Kuva: Ruskeala Symphony -festivalin VK-šivu

Kuuvveš Ruskeala Symphony -musiikkifestivali starttasi eklein. Vuosien mittah še tuli ei ainuoštah Karjalan, ka i koko Venäjän tärkiekši kulttuuritapahtumakši.

Musiikkifestivalin järještäjien šanojen mukah, festivalilla vuotetah noin 6 000 kävijyä kahen päivän aikana.

– Meijän partn’orien avulla tänä vuotena enšimmäistä kertua järješšetäh Ruskeala Symphony -festivalin šuora lähetyš Kul’tura RF -saitilla šekä sosialiverkoissa, kerto Karjalan filharmonijan johtaja Irina Ustinova.

Festivalin enšimmäisen päivän ohjelmašša oli vain yksi konsertti. Tänäpiänä “Ruskeala Symphony” jatkuu ta tariččou vierahilla kahekšan mukavua erityylistä konserttie kallivopuiston eri kentillä.

Toini festivalipäivä keryäy kuulusie artistoja ta tunnettuja kollektiivija. Kuuntelijat otetah vaštah huomenešta meditatijon kera, mitä šeuruau elävän musiikin šoitto. Šiitä vierahie vuottau venäläini ta ulkomualaini klassillini musiikki, a Marmorakanjonin järven pinnalla esiintyy Kantele-yhtyveh.

Šamoin ohjelmašša šuau kuulla tuvalaisie šävelmie, kuubalaista jazzie, venäläistä kanšanmusiikkie, henkellisie šävellykšie ta torvimusiikkie. Festivalin lopetetah Karjalan filarmonijan Simfonisen orkesterin klassiset sinfoniset tevokšet.