Ruskeala Symphony: Karjalas pietäh kymmenes festivuali
Ruskeala-mägipuustoh 17.—18. heinykuudu kerävyy muan parastu soittajua da pajattajua. Heijän joukos Ven’an kanzalline artistu Sergei Bezrukov, Suuren da Mariinskoin teatroin solistat da äijät toizet.
Tavan mugah suurimat konsertat pietäh ainavoluaduzes ymbäristös — Itaalien kaivoslouhimos.
— Kymmenetty Ruskeala Symphony -festivualii myö valmistammo vähäzel varaten, nareko emmo sano kaikkii peittožuksii da valmistammo yllätyksii. Ruskeala Symphony, kuduas ezitytäh meijän muan da rajan taguapäi tulluot parahat kollektiivat, rodih kuulužakse ei vaigu Karjalas, ga kogo Ven’al, sanoi Karjalan piämiehen lehtistöpalvelule Larisa Podsadnik, Karjalan haldivon premjer-ministran sijahine.
Festivuali algavuu 17. heinykuudu. Enzimäzenny piän laval ezittyy Sergei Bezrukov. Häi valmistau muuzikkupoeettizen ozutelman ”Kaksi runoilijua”, kudai on omistettu Sergei Jeseninan da Vladimir Visotskoin eloksele da runohuole. Bezrukovan ezityksen myödäh rubieu soittamah orkestru.
Festivualin tossu piän ildupuoles gala-konsertas suau kuulta da nähtä Suuren da Mariinskoin teatroin solistoi.
Ruskeala Symphony -festivualin programmah kuulutah kogo perehile tarkoitetut konsertat, etno- da džasjoukkoloin ezitykset, barokko-stiil’an viel soitettu muuzikku, karjalazien dizaineroin mouduozutukset da äijy muudu.
Aihies voit lugie suomeksegi.
Yhty Oman Median kanualah Telegramas!
