Ruskeala on sanottu toizekse kaunehimakse
Moja planeta -telekanualu da Russian Traveler -julgavo ilmoitettih iänestyksen tulokset, kuduan aigah vallittih Ven’an kaunehimua turistukohtua. Juuri niilöis kohtis iänestäjien mugah voibi luadie parahat fotokuvat. Iänestysty piettih yhtehizis kanualois da sotsiualuverkostos, iänestäjil kehoitettih vallittavakse yksi kohtu kymmenes, kuduat edukädeh vallittih toimitukset. Iänestykseh yhtyi 752 hengie.
Ruskeala-kivipuusto on sanottu Ven’an toizekse kaunehimakse turistukohtakse — 12, 8 % iändy. Kaččojien iänestyksen mugah enzimäzele sijale on piässyh Baikal-järvi, kudai sai 21, 1 % iändy. Kolmandekse puututtih Bermamit-plato Karačajevo-Čerkesies da Komin tuulipaččahat Man’-pupu-n’or-alovehel — 9, 8 % iändy.
— Iänestyksen tulokset ozutetah mieldykiinnittäjiä kuvua: matkustajat tahtotah kuvata ei vaigu kaunehii kohtii, ga kohtii, kuduat rounoku ei olla moizet, kui Muan piäl. Baikalan jiä, Altain ”Marsan” kuvat, mramorulouhimo — kai net kohtat ollah rounoku fantastiekkufil’man dekoratsiet, kerdou Moja planeta -telekanualan piätoimittajan Roman Lobašovan sanoi Moja planeta -telekanualu.
Viijen parahien joukkoh paiči iel mainittuloi on sanottu vie Aniva-majakku Sahalinan suarel — 9, 3 % iändy da Tobizinan niemi Russkii-suarel — 8, 6 % iändy. Ielleh matkatah Altain Kizil-Čin-aloveh, kuduadu sanotah ”Marsakse”, Lenan paččahat Jakuties, Dagestanan Sulaksii kanjon -kohtu da Kamčatkal sijoitunnuh Kuolluh meččy da Tolbačik-tulimägi.
Aihies voit lugie vepsäkse da suomekse.
Yhty Oman Median kanualah MAX:as!
