Runoloin päiväkse pietäh lyhyöt luvendot
Karjalazien runoloin päiväkse, kudai on 10. kezäkuudu, pietäh illačču, kuduas sanellah ennevahnazes perindös da sen nygyaigazes jatkos.
Kanzallizen da alovehellizen poliitiekan ministerstvan hommatus pivos suau kuulta nelli lyhytty luvenduo, tiijustua karjalazien eeppizien pajoloin tärgevimis juondehis, kuulta runot-novinat da juohattua, kui luadie perindö movvakkahakse.
— Luvendoiččijoikse kučuimmo Kielen, literatuuran da histourien instituutan ruadajii, folklouran tutkijoi Valentina Mironovan da L’udmila Ivanovan. Petroskoin valdivollizen konservatourien magistru Tatjana Bel’ajeva pajattau ”uuzii” runoloi — nevvostovallanaigazii novinoi, kudamii pajatettih karjalazet runonpajattajat. Tuari-etnojoukon muuzikkumies Vsevolod Šain sanelou, kui heijän mugah kuuluu ennevahnaine karjalaine perindölline runo, sanoi Oma Mediale Jelena Migunova, Kanzallizen da alovehellizen poliitiekan ministerstvan ozaston piälikkö.
Karjalazile runoloile omistetun illačun vedäjänny rodieu Kieli-instituutan ruadai, folklouran tutkii Marija Kundozerova. Pido algavuu 16.00 aigah Periodika-julguamon seinis Ystävyskois Titovan pihal, 3.
Aihies voit lugie ven'aksegi.
