Karjalan yhteiskunnallisien järještöjen aktivistit ehotettih omistua tulija vuosi Karjalan runoloilla. Valmistelu šiih jo alettih. Nyt luajitah Runola -nimistä kalenterie enši vuuvvekši, šen avulla šuau tuttavuštuo Karjalan mifologijan haltijien kera.
— Noin puoli vuotta mäni kalenterin valmistamiseh. Marija Kundozjorova tutkiu karjalaista kanšanrunoutta ta hiän löysi tietokirjoista ennein meiläki tuntemattomie haltijie. Myö piättimä kertuo niistä kalenterin avulla – kerto Runola-kalenterin projektin kurattori Tatjana Berdaševa.
Kalenterissa on 12 haltijan kuvua, kumpasie piirušti taiteilija Dmitri Dmitrijev, niise on Maria Kundozjorovan valmistamie tekstijä haltijista ta runoja. Kalenteri on venäjän ta karjalan kielellä. Tilata kalenterin šuau šähköpostitse runola@list.ru.
Karjalan runojen vuosi on omissettu Karjalan kanšanrunouvven šäilyttämisellä. Tulijan vuuvven aikana pietäh tilaisukšie, kumpasissa šuau tiijuštuo ket oltih tunnetut Karjalan runonlaulajat, miten tietomiehet kerättih runoja ta miten ne tutkitah nyt, šekä kuunnella runojen esittämistä.