Runokilbu: paras kiännös Petroskoispäi
Muailman runohuon päivänny Sankt-Peterburgan Majakovskin nimellizes kirjastos ilmoitettih runoloin kiändäjien kilvan tulokset nominatsies ”Ven’an kanzoin kielet”. Täs nominatsies kilbailtihgi karjalankielizen runon kiändäjät.
Karjalan kieli täh kilbah oli otettu enzimästy kerdua. Kiännettäväkse oli kehoitettu Anuksen lohkon karjalazen Vas’a Veikin runo ”Hengi” livvin murdehel.
Vas’a Veikin runon kiännökset kilbah työttih Kaliningruadan, Velikii Novgorodan, Sankt-Peterburdan linnoin, Piiterin da Penzan alovehien da Karjalan eläjät. Arvostajien joukos oldih opastai da kiändäi Tatjana Baranova, lehtimies da kiändäi Aleksandr Jeremejev, literatuuran tutkii Natalja Čikina.
Parahakse oli vallittu petroskoilazen Vera Prokopjevan kiännös, kudai sai 29 ballua da puutui voittajien kiännöksien kogomukseh. Sen piästi ilmoih Majakovskin nimelline kirjasto.
Vera Prokopjeval on 84 vuottu. Petroskoin yliopiston loppiettuu häi ruadoi liäkärinny tazavallan lapsien bol’ničas, oli kardiolougien ozaston piälikönny.
— Vera Ivanovna kymmene vuottu opastuu karjalan kieldy kielikursiloil. Häi on ylen nerokas da hyväntahtoine ristikanzu. Runon kiännöksen enzimäzen variantan häi valmisti kerras, ga sit rubei miettimäh da kohendelemah, vaste kolmen kuun peräs rodih valmis se variantu, kudai oli työtty kilbah, sanoi Oma Mediale Tatjana Baranova.
Karjalas kilvan suurdu ruaduo hommai Al’ona Sänti, Petroskoin keskuskirjaston ruadai.
— Minä olen ylen hyväs mieles, ku karjalan kieli da kul’tuuru roittih tämän suuren projektan vuitinnu. Karjalan tazavaldu kuului kilvas da monile se avavui uudeh luaduh, kirjutti Al’ona Sänti omassah VK-sivul.
Kilvas toizen sijan sai Gatčinas eläi Natalja Punžina, kolmanden da nelländen sijat juattih Ol’eg Mošnikov da Ol’ga Hramtsova.
Kilvas oli Ven’an da ulgomualoin runoilijoin tevostu 22 kielel. Kilbah oli työtty lähes 400 runokiännösty.
Yhty Oman Median kanualah Telegramas!
