Runojen vuosi on loppun Karjalašša
Karjalaisien runojen vuosi on loppun Karjalašša. Vuosi oli rikaš tapahtumilla ta monilla karjalaiset runot tultih innoššukšen lähtehekši. Vuuvven lopputilaisuošša šelailtih tapahtumien kalenterie ta muisseltih, mitä oli pietty vuuvven aikana koko Karjalašša.
— Runojen vuoši autto avata meilä ičellä šitä viisahutta ta rikkahutta, kummaista karjalaiset runot šäilytäh, šekä karjalaisen rahvahan šielun šyvyttä. Tämä perintö oli šäilyn täh päiväh šuaten ta meijän tarkotukšena on tuttavuštuo šiih meijän lapšie. Karjalaisien runojen vuosi loppu, ka meijän yhtehini ruato kanšalaisjärještöjen ta luovaryhmien kera jatkuu, korošti Karjalan tašavallan kanšallisen ta alovehellisen politiikan ministeri Sergei Kisel’ov.
Ministeri myönti kiitoš- ta kunnivokirjoja järještöillä ta laitokšilla, kumpaset aktiivisešti otettih ošua Runojen vuuvven tilaisukšien järještämiseh ta pitämiseh. Niise oli myönnetty palkintoja runojen parahilla esittäjillä. Kilpailušša oli viisi nominatijuo ta niijen voittajiksi tultih Aleksei Ognev, Vesläžed-yhtyveh, Kulkuset-yhtyveh, Sohjanan virta -ryhmä ta Oma Pajo -kuoro.
Lisyä Karjalaisien runojen vuuvven lopputilaisuošta luve Oma Mua -lehen 48. numerošša.
