”Ruaduo Ven’al”: Pitkänrannan piiris on avattu ruadoväinkeskus
Pitkänrannan piiris on avattu viijestostu ruadoväinkeskus ”Ruaduo Ven’al”. Uvvistetus ruadoväinkeskukses on azuttu omat tilat ruavoneččijöile da ruavonandajile: digitualupalveluloin kohtu, paginpertit, lapsienčuppuine, istundo-zualu. Uvvistettuloi mugažii sijoi arvostettih Pitkänrannan piirin piälikkö Konstantin Bulahov, ruatuttajat, ruadoväinpalvelun partn’ourat, nuorižo, lapset da ruavoneččijät.
— Ruadoväinpalvelun piälimäine tavoiteh tänäpäi on ruatuttajile pättävien ruadajien valliččemine da nuorien, opastuslaitoksien loppenuzien ruadoh azettamine. Uvvistettulois ruadoväinkeskuksis uuzih ruadotaboih opastetut spetsialistat autetah nuorile vallita oigei ruadotaival, sanoi Karjalan ruadohalličuksen piälikkö Jelena Frolova omassah lehtistöpalvelule.
Uvvistetus Pitkänrannan ruadoväinkeskukses jo piettih enzimäine ruatuttajien kluuban vastavus. Ruadoväinkeskuksen spetsialistat saneltih zakonoin muuttamizis, kannatuskeinolois, kanzallizen Ruadovägi-projektan uuzis mahtolois. Keskukses piettih nuorižon da naizien kluubien vastavukset, kudamis rahvas tiijustettih oman biznesan alguamizes valdivokannatuksel.
Jo tänä vuon joga toine, ken kiändyi Pitkänrannan piirin ruadoväinkeskukseh, löydi ruadosijan. Tänäpäi piiris kirjoil on 62 ruavottomua. Mennyt vuon 25 hengie suadih uvvet ruadonerot alovehellizen programman da kanzallizen Demogruafii-projektan mugah.
Vuvvennu 2024 loppietun Demogruafii-kanzallizen projektan hyvyös Karjalas on uvvistettu 16 ruadoväinkeskustu. Tänä vuon rahvahan ruadoh azettamizen hyväkse ruvetah jatkamah ruaduo kanzallizen Ruadovägi-projektan mugah.
Terväh Sordavalan piiris avavuu vie eräs ruadoväinkeskus.
