Ruadojarmanku: ruadajat da ruatuttajat vastavutah
Karjalas 17. sulakuudu pietäh Ruado Ven’al, mahtoloin aigu -ruadojarmankan alovehelline vuoro. Pido kuuluu kanzallizeh Kadrat-projektah. Sen piätarkoituksennu on suaja uuttu ruadajua ekonoumiekan niilöile aloile, kudamis niidy enimite tarvitah.
Jarmankah yhtyy enämbi 115 ruatuttajua. Ruadoh kuhkuttamah ruvetah Petroskoin enämbi 30 laitostu, niilöin luvus Karelstroimehanizatsija, Petrozavodskmaš, Karelijanefteprodukt, Oniegan laivuzavodu, Avangard, Karelgaz, Slavmo, Amkodor-Onego da toizet.
— Vuvvennu 2026 Ruado Ven’al -kadrukeskukset piettih 123 mostu jarmankua. Niilöih yhtyi tazavallan enämbi 1600 eläjiä, se on 40 % enämbi, migu mennyt vuon. Enämbät puolis ruadajis ihan pivon aigah piettih keskustelut ruatuttajien kel, sanoi Karjalan piämiehen lehtistöpalvelule tazavallan Ruado Ven’al-kadrukeskuksen piämies.
Ruado Ven’al, mahtoloin aigu -ruadojarmankua pietäh Ven’an prezidentan Vladimir Putinan käskys. Sen avul ruadajat voijah löydiä pättävy ruado, ruatuttajat aigoinaijal löydiä ruadajii niilöile aloile, kudamis niidy tarvitah. Paiči sidä jarmankoin aigah pietäh nevvondoi da ruado-pajoi ruadoneroloin korrendamizekse.
Jarmankua pietäh 17. sulakuudu 10.00—17.00 čuasun aigah Karjalan kaikis kadrukeskuksis. Petroskois pido roihes Ruado Ven’al -kadrukeskukses adresil Kirovan piha, 25.
Aihies voit lugie suomeksegi.
Yhty Oman Median kanualah Telegramas!
