“Rossija”-keskuz kucub Karjalan eläjid ühtnemaha saifestivalihe
“Rossija” -Rahvahaližen keskusen internet-lehtpolele voib jätta pakičusen, miše ühtneda “Venäma. Ühtenzoites südäimid” -III Ühthižvenälaižehe saifestivalihe. Se mäneb 8. da 9. heinkud, miš tedotadas Karjalan Valdkundan oficialižel lehtpolel.
Festivalin pätegend om siš, miše Perehen, armastusen da uskoližuden päivän praznuitas äi sajid, i sihe voiba ühtneda mel’dünuded ristitud kogonaižel Venämalpäi.
— Festivalin tem om “Ühtmuz’ armastuses”. Nece om südäimiden, kul’turiden, tradicijoiden da kal’husiden ühtmuz’. Olem jo sanuded ezmäižed pakičused. “Venäma. Ühtenzoites südäimid” -festival’ ühtenzoitab sugupol’vid i zavodib uzid tradicijoid. Azjtegon aigan naiba meiden keskusen radnikad-ki! Mö tugedam ristituid, ked tahtoiba tehta perehen, i kucum mel’dünuzid mehid kogonaižel Venämalpäi ühtnemaha armastusen praznikaha, sanub “Rossija” -Rahvahaližen keskusen pämez’ Anastasia Zv’agina.
8. heinkud “Rossija”-keskuses mäneb praznikaline naindvero. Sigä-žo edeližil festivalil sündnuded perehed andaba “Venäman südäin” -perehlämoin uzile perehile. Lämoi todas Muromaspäi, mitte om pühiden P’otran da Fevronian kodima.
9. heinkud festivalin ühtnikoiden da adivoiden täht vedetas mastar’-klassad, lugetas lekcijad, ozutadas kulinarine šou, tehtas ekskursijad keskusen ozutelusidme.
Pakičusid voib oigeta 22. semendkun päivähasai. Ühtneda voib vaiše rahvahaližiš sädoiš vai sädoiš, miččiš om rahvahaližen sädon elementoid, — muga festival’ ozutab erazvuiččid Venäman kul’turid da niiden ühtmut.
Ezmäine “Venäma. Ühtenzoites südäimid” -festival’ mäni vodel 2024, siloi sündui 221 pereht, miččiden keskes oli i Aleksandr Kobrinan da Maria Mišinan pereh Karjalaspäi. Vodel 2025 meiden valdkundaspäi oli kaks’ pereht: Vladislav F’odorov i Anastasia Lebedinskaja, Anatolii Sulojev i Anastasia Garaščuk. Festival’ tehtihe jogavoččeks, se mäneb P’otr da Fevronian muštpäivän.
Uzišt neciš temas voib lugeda mugažo karjalaks.
Tarkištele "Oma Median" MAX-kanalad!
