Roždestvenskoin festivuali pietäh Karjalas
Robert Roždestvenskoin nimelline muuzikku-runolline festivuali pietäh Petroskois 4.—12. syvyskuudu.
Pivon aigah pietäh runollizii, muzikuallizii, teatru- da opastustapahtumii. Robert Roždestvenskoin nimi on kingiesti sivottu Ven’an runohuon da muuzikkah. Hänen sanoin perustehele on kirjutettu äijy kuulužua pajuo. Roždestvenskii on lahjakkahii 1960-luvun runoilijoi. Hänen runolois kuvastuu oman muan suvaičus, Ven’an histourii, rahvahan tunnot, voinan da rauhallizen elaijan aihiet. Händy tundietah kiändäjännygi. Vuvvennu 1980 Olimpiiskoloin kižoin avajazis kuului Olimpiiskoi gimnu ven’an kielele kiännetynny. Sen kiännöksen luadi Roždestvenskii.
Festivualin pidoloi valmistetah eri tilois. Algavuu se 4. syvyskuudu Kirovan lagevol. Tossu piän Petroskoin Glazunovan nimellizes konservatouries avavuu kirjoin da noottien ozuttelu. Syvyskuun 6. da 13. päivinny Petroskoi pietäh ekskursieloi niilöi kohtii myöte, kuduat ollah kiini Roždestvenskoin nimeh.
— Karjalan kanzoin ystävyskois pietäh ”kirjalližusgost’uperti”, kuduas lugietah Roždestvenskoin runoloi kanzallizil kielil. Petroskoin konservatouries pietäh muuzikku-runoline kompozitsii, kuduah yhtytäh opastujat da opastajat, andau tieduo Karjalan piämiehen lehtistöpalvelu.
Syvyskuun 10. päivänny filarmounien tyves Ven’an kirjuttajien liitto pidäy programman ”Elävy sana. Karjalan nugöine runohus”. Tossu piän Petroskoin yliopistos, kuduas opastui runoilii, pietäh fleš-mob, foto-ozuttelu, ruado-pajat. Syvyskuun 12. päivänny Kanzallizen kirjastos avavuu Roždestvenskoin kirjoin ozuttelu da pietäh vastavus runoilijan tyttären jekaterina Roždestvenskoin kel.
Aihies voit lugie suomeksegi.
Yhty Oman Median kanualah MAX:as!
