Ribatlon-kilbu: pakkazelgi kala näykki
Belomorskan piirin Šuikujärvel nelländeh kerdah piettih Ribatlon-kilbu. Pakkaine, kudai yldyi 25 gruadussissah, ei varaitannuh kilbuniekkoi.
Täl kerdua kilbaili 60 joukkuo. Jogahizes joukos on kaksin hengin: kalastai da hiihtäi. Kalastajal pidäy suaja 2 kalua, hiihtäjäl pidäy ajua suksil kaksi kerdua puolitostu kilometrii.
Tämän vuvven kilbah tuli rahvastu Ven’an eri puolis, oligi kilbuniekkua lämmis mualoispäi.
— Petroskoin yliopiston joukko yhtyi tämän vuvven kilbah. Yheksän hengen joukos oli meigäläine briha da nuoret Kongos, Kot-d’Ivuaras, Nepalas. Efioupies, Mozambikas, Iranas da Brunejaspäi. Hyö ei arvattu, ku rodieu muga vilu, sendäh yheksäs henges kerävyi vaiku yksi joukko. Segi muite vai yhtyi kilbah, ga vierahanmualazet oldih ylen hyväs mieles. Sanottih, ku tahtotah tulla uvvessah, vaigu kezäl, konzu rodieu lämmembi. Tossu piän minä ozutin heile meijän kallivopiirustukset, Karjalan frontan da kodialovehellizen muzeit, sanoi Oma Mediale Vadim Vokov, Karjalan Ribatlon-kilvoin valmistai.
Tämän vuvven kilbah yhtyi 120 kilbuniekkua da oli lähes 100 kaččojua. Voittajakse piästih Kemin linnan eläjät Sergei Haritonov da Roman Ladikainen. Toizele sijale nostih Sosnoučan da Belomorskan eläjät Denis Polkunov da Vladimir Petrov. Kolmandele sijale piästih moskovalazet Vitalii Golovkov da Demid Medvedev.
Lähi aigua kalastajat voijah tuaste ozuttua omua neruo festivualis Giperboreja-2026. Sen hantuzis Petroskois pietäh talvikalastuksen suuri kilbu.
Aihies voit lugie suomeksegi.
Yhty Oman Median kanualah Telegramas!
