Belomorskan piirin Šuigärvel 15. tuhukuudu pietäh Kogo Ven’an ribatlon 2025 -joukkokilvan alovehelline etuappu. Kahten hengen kilbujoukos pidäy olla kalastai da hiihtäi. Kalastajal pidäy suaja kaksi kalua, hiihtäjäl pidäy hiihtiä suksil kaksi kruugua, kudamis jogahine on puolitostu kilometrii.
— Talvel ribatlon-kilbua rubiemmo pidämäh jo kolmattu kerdua. Enzimäine oli vuvvennu 2023. Silloi kilbah yhtyi lähes 90 hengie, vuvvennu 2024 kilbuniekkua oli jo enämbi, kilbaili 58 joukkuo, sanoi Karjalas ribatlon-kilvan alguhpanii, Belomorskan piirin Rassvet-kalastajien kluuban piälikkö Vadim Volkov Oma Media-portualale.
Kilvan järjestäjät uskaldetah äijän lahjua voittajile. Vadim Volkovan sanoin mugah kilvan järjestämizes da lahjoin ostamizes autetah Belomorskan piirin haldivo, Karjalan biznesmiehet da kalastajat, kuduat eletäh toizil Ven’an alovehil.
Kilbah kučutah kaikkii tahtojii igäh, sugupuoleh da kalastus- da hiihtoneroloih huolimata. Kilbah yhtymine on ilmaine.
Registriiruijakseh voibi soittamal: +7 (921) 800-89-72 (Vadim Volkov), 8 (81437) 51054 (Belomorskan piirin voimistelun, nuorižoazieloin da turizman kehityksen haldivo).
Aihies voit lugie suomeksegi.