Ruskiennu langannu Karjalan piämiehen hyvittelypaginas oli se ajatus, ku lehtimiehen ruado on ylen tärgei, ku sanotus da kirjutetus sanas on ylen äijy vägie.
— Se on ylen mieldykiinittäi luomisruado, konzu joukko lähtöy ruadomatkah, pagizuttau rahvastu... Karjalaine žurnalistiekku on minun lapsusaijan vuitti, sanoi Artur Parfenčikov musteltes karjalastu televiideniedu, sie oli ruadamas hänen muamah.
Kunnivolehtimiehien luvettelon avai Valerii Anatoljevič Tol’skii, Karjalan kuulužimii da vahnimii lehtimiehii, poliitiekku da yhteiskunnalline ruadai häi sai Karjalan korgeviman valdivollizen palkičuksen — Sampo-ordenan. Tänä vuon 85 vuottu täyttänyh Valerii Anatoljevič potakoičči omii ruadodoriššoi kirjuttamah enämbän hyviä, migu pahua.
Palkittuloin joukos on kuulužu suomenkieline lehtimies Reino Rugojev. Reino Jakovlevič kai oman ruadoijän ruadau kanzalliskielizen televiidenien da raadivon toimittajannu, hänen iäni on hyvin tuttu Karjalan eläjile. Tänäpäi häi on kanzalliskielizen tv- da raadivolähetyksien tiijollizen služban piälikkö. Oman kuulužan tuatan Juakko Rugojevan jyttyöh Reinon ruadotabaleh on kiini omas muas da omas kieles. Omas monivuodehizes ruavos Reino Rugojev on suannuh medalin “Arvoruavos karjalan tazavallan hyväkse”.