Reboli-küläs avaitihe Sur’ Kodiman voinan veteranoiden memorial
Reboli-küläs avaitihe Sur’ Kodiman voinan veteranoiden memorial, miš tedotab Rahvahaližen da regionaližen politikan ministerstvan press-služb. Memorialan azotamižehe sidotud projektan rad zavottihe kaks’ vot tagaze: siloi “Gracija” -tahon ičenaižen valdelimen aktivistad da Reboli-külän eläjad eciba materialoid da tedoid, oppiba arhivoid, tegiba Suren Kodiman voinan ühtnikoiden familijoiden lugetišid.
Vodel 2025 projekt vägesti konkursas, i 3. semendkud 2026. vodel oli avaitud memorial — se omištadihe Vägestusen Päiväle. 9. semendkud Reboli-külän eläjad da adivod keradase udes, miše muštta niid, ked kaičiba meiden Kodimad vihanikoišpäi Suren voinan frontoil.
Memorialaha mülüb koume palad. Sen keskel om Pühän Georgijan lentaine da Vägestusen Orden. Lentaižen oiktalpäi da huralpäi om azotadud kivesižed muštpachad, miččiš om kirjutadud saldatoiden, konclageriden uznikoiden da saubatud Leningradan eläjiden nimed.
— Nece memorial ei ole vaiše nimiden lugetiž, nece om todesine sugupol’viden sido da johtutez siš, miše meiden penen kodiman istorijan tegeba ristitud, meiden läheližed, sanui Marina Sedleckaja, Reboli-külän eländtahon pämez’.
Karjalas tahoiden paremboitusen projektad oma kaikid popul’arižembad. Tahon ičenaižen valdelimen projektoiden todenzoitamižehe valdkundan b’udžetaspäi anttas 90% kogonašt projektan rahoitust, no nece rahatugi ei voi olda enamb üht millionad rubl’ad — lopud maksab iče tahon ičenaine valdelin da sen investorad.
Tarkištele "Oma Median" MAX-kanalad!
