Rahvahiden sebruden kodi jatktab ičeze tundištoituzurokoid Karjalan polhe
Kaikuččel vodel Karjalan rahvahiden sebruden kodi tegeb “Sebruden urokoid”, miččil tundištoitab päazjan augotižškoliden lapsid Karjalan rahvahiden kul’turanke. Tämbei mugoižed urokad mäniba Šokšun da Šoutjärven 3.—11. klassoiden openikoiden täht.
3.—6. klassoiden urokoiden programmaha mülüiba vepsän kelen mastar’-klass “Kipinä”-kulehtesen radnikoilpäi, tundištoitused Karjalan rahvahaližiden muzikaližiden instrumentoidenke, karjalaižiden vändoidenke da karguidenke. Vanhembiden-žo, 9.—11. klassoiden openikoiden, täht tehtihe kviz. Sil openikad andoiba vastused küzundoihe, miččed koskeba Karjalan igähižid rahvahid, heiden veroid da tradicijoid.
— Minä starinoičin lapsile Karjalan muzikaližes kul’turas da rahvahaližiš instrumentoiš. Enamba kaiked starinoičin kanteles. Mugažo ühtes lapsidenke mö openzim ühten runon Kalevalaspäi da “Säkki, Varvakki” -vepsläižen pajoižen. Sid’ lapsed iče vändiba niid kantelel, starinoiči “Kičči-kočči”-ansambl’an ohjandai Alina Kartinen.
Karjalan Rahvahiden sebruden kodi jatktab ičeze tundištoituzurokoid Karjalan polhe lapsiden täht. Toine mugoine vastuz mäneb jo pigai Kondopogas.
Tarkištele "Oma Median" MAX-kanalad!
