Rahvahiden ühtmuden voden avaidab “Venäma – perehiden pereh” -marafon
5. uhokud “Rossija” -Rahvahaližes keskuses mäneb čoma “Venäma — perehiden pereh” -kul’turmarafon, mitte ühtenzoitab enamba 2900 erazvuiččiden rahvahiden ezitajad 89 Venäman regionaspäi, läz 1000 norišton projektad da enamba 50 adivod verhiš maišpäi. Necil azjtegol zavodidas Venäman Rahvahiden ühtmuden voz’. Siš tedotadas “Rossija” -Rahvahaližen keskusen oficialižel Internet-lehtpolel. Homaičusen keskhe om pandud ičeladuine Venäma, kus sadad rahvahad eläb kuti üks’ pereh. Marafonan avaidusehe ühtneb Venäman Valdmehišton varapämez’ Tatjana Golikova.
— Nece tedotelendprojekt om oigetud Venäman rahvahiden ühtmuden, kožmusen da kesknäižen el’gendusen vahvištoitusehe. Sen abul voib ozutada, miše äikeližuz’ da erazvuiččed kul’turad bohatoitaba mad — nece om eduz geopolitižiden vajehtusiden aigan, kirjutadas “Rossija”-keskusen lehtpolel.
Marafonal ezineba meiden man tetabad ristitud: Venäman gerojad, lahjakahad sportmehed, kul’turan da taidehen polen ezitajad (Vladimir Medinskii, Jevgenia Medvedeva, Nikolai Ciskaridze, Jegor Berojev da toižed). Kul’turprogrammaha mülüba erazvuiččiden artistoiden ezitused, a mugažo sädand-, sport- da keitändmastar’klassad, miččed vedäba tetabad mehed.
Adivoil linneb voimuz kacta dokumentaližed fil’mad Altajan, Venäman Pohjoižen da Kamčatkan londuses, kul’turas i istorijas. Marafonal radaškab rahvahaližen literaturan kirjišt — erazvuiččiden rahvahiden kirjutajiden sädandradoiden keradamišt. Keitändriviš kaikutte tahtnik voib mujada kürzid da sul’čnid, keitosid, pirgoid, pel’menid da magedusid — rahvahiden keitändladud. Ühtmuden simvolaks tehtas sur’ “Sebruden horovod”, miččehe ühtneba kümniden rahvahiden ezitajad.
Sen ližaks marafonan aigan tedotadas, konz täl vodel mäneb “Tavrida.ART”-festival’, sil-žo aigal zavodidas registracii necile festivalile.
“Venäma — perehiden pereh” -marafonan tegii om Venäman “Znanije”-sebr, sen partn’orad oma Venäman Tedon da üläopendusen ministerstv, Norišton azjoiden federaline agentstv (Rosmolod’ož), “Rossija” -Rahvahaline keskuz, Venäman Rahvahiden kodi, Venäman rahvahuziden azjoiden federaline agentstv da Venäman Prezidentan rahvahidenkeskeižiden kosketusiden nevondišt.
Uzištoid neciš temas voib lugeda mugažo karjalaks da suomeks.
Tarkištele "Oma Median" Telegram-kanalad!
