Rahvahaližele mediaportalale om täudunu viž vot
“Oma media” -portal zavodi ičeze radon 2020. voden sügüz’kus. Neciš aigas oli vaumištadud enamba 9000 uzištod da enamba 1000 kirjutest suomen, karjalan, vepsän da venän kelil.
Rahvahaližel “Oma media” -portalal paindas uzištod da kirjutesed, miččed koskeba erazvuiččid elon polid: ekonomikad, kul’turad, tegeližut, külän elomištod, opendust i äjad tošt. Erine homaičuz om kingitadud azjtegoile, miččed om sidotud Karjalan tradicionaližehe kul’turaha da istorijaha. Material om ezitadud suomen, karjalan, vepsän da venän kelil. “Periodikan” lehtesiden da kulehtesiden radnikad abutaba portalale tedoiden levitamižes.
— Neniš voziš “Oma media” tegihe Internetas päsijaks, kus mö starinoičim lugijoile azjtegoiš, miččed tehtas vepsän mal. Ližaks, neciš aigas mö lujas bohatoitim kel’t udel vaihištol, sanub “Kodima” -lehtesen toimitai Irina Sotnikova.
“Oma media” -portalale paiči uzištkontentad da tedoid “Periodikan” painusiš om pandud karjalan da vepsän keliden elektronižed kursad. Portalan radnikoiden planoiš om ližata niid da mugažo kehitoitta ei amu portalale pandud “Oma radio”- da “Oma video”- modul’ad.
Uzištoid neciš temas voib lugeda mugažo karjalaks, suomeks da venäks.
