Puškinan korti: jogahizele 22 vuottu nuorembale
Karjalan tazavallan piämies haldivon istundos käski, ku tazavallas eläjis nuoris 85% suadas Puškinan kortit. Artur Parfenčikov käski suurendua kortin omistajien luvun. Sih nähte opastuksen da kul’tuuran ministerstvoil tulou suaja yhtevytty kaikkih školih, opistoloih, yliopistoh.
Vuvven 2026 pakkaskuun 1. päiväs Puškinan korti -programmas vastuau VTB-banku. Kaikil kortin omistajil pidäy luajittua korti uvvessah. Se voibi luadie Gosuslugi. Kul’tura -sovelduksen vuoh, pidäy työndiä sinne zajavleenii talvikuun 28. päiväh suate. Ken ei ehtine luadie sidä, voibi ruadua sen uvven vuvven pruazniekoin jälles. Yhtelläh sit kortile jiännyöt varat mennäh sudre, sendäh parembi on luajittua uuzi korti aigoin aijal.
Karjalan kul’tuuruministru Aleksei Lesonen kerdoi, ku vuvves 2022 enämbi 37 tuhattu Karjalan školaniekkua, yliopastujua da nuordu ristikanzua suadih Puškinan kortit. Se on enämbi 72% kaikis Karjalas nuoris. Vuvves 2025 Puškinan korti -programmua todevutetah kanzallizen Pereh-projektan mugah.
— Puškinan korti on annettu kazvajale polvele kul’tuurualan laitoksih käyndäkse. Se andau mahton säilyttiä da lujendua Ven’an perindöllizii hengellis-moralikallehuksii, sanoi Karjalan piämiehen lehtistöpalvelule Aleksei Lesonen.
Puškinan korti on virtual’noi bankukorti, kuduas on viizi tuhattu rubl’ua. Net varat voibi käyttiä kul’tuupidoloih, muzeiloih, teatroih, kirjastoloih, ozutteluzualoih, kul’tuurualan laitoksih käyndöih. Kul’tuurualan laitokset sen vuoh suurendetah käyjien luguu da tuloloin suuruttu. Karjalan 52 laitostu kuulutah programmah.
Yhty Oman Median kanualah Telegramas!
