Karjalan Rahvahan Liitto potakoiččou nuorii da lapsii työndämäh Karjalan alovehel luajittuloi fotokartočkoi kezäkuus 1941 vuvven 1945 syvyskuussah (6+). Uudeh aktsieh voijah yhtyö 10—25-vuodizet nuoret. Vastah otetah eri žanroin fotokuvii: dokumental’noloi fotokartočkoi, pihal luajittuloi fotokuvii, portriettoi, luonnan kuvii da toizii.
— Panimmo rattahile tämän aktsien, ku kiinittiä nuorižon mieldy oman roindumuan histourieh, ku kazvattua nuoris oman muan patriottoi, ku säilyttiä musto Ižänmuallizes voinas. Vie yhtenny aktsien tavoittehennu on perustua sähköarhiivu, kudamua suajah käyttiä Karjalan eläjät kui omih tarbehih, mugai Ižänmuallizele voinale omistettuloi pidoloi järjestäjes, sanou Karjalan Rahvahan Liiton piälikkö Anna Jakovleva.
Fotokuvat pidäy olla jpeg-formuatas, joga fotokuvah niškoi pidäy olla tieduo: kohtu, ristikanzan libo objektan nimi, kuvuandan aigu. Aktsieh yhtyjäl pidäy kirjuttua oma nimi, sugunimi da igä. Luadijan oigevuksis vastuau aktsieh yhtyi.
Materjualoi otetah vastah sähköpoštale kevätkuun 31. päivässäh 2025. Kirjazen tiemah pidäy kirjuttua ven’akse “Акция_Карелы” sulakuun 30. päivässäh roih valmistettu sähkölline fotoarhiivu, oraskuus pietäh fotoarhiivan prezentatsii.
Karjalu hengis: Histourii. Kieli. Kul’tuuru -projektu on kannatettu Karjalan tazavallan piämiehen grantoin fondal, akstii pietäh Karjalan rahvahan luomisruavon da kul’tuuruinitsiatiivoin keskuksen da Periodika-julguamon kannatuksel.