Priäžäs pannah nägövih piirin entokul’tuuristu ruaduo
Etnokekskuksen ruadajil on suittunuh jo äijy kallistu neruo etnokul’tuurualal. On todevutettu äijy projektua, on suadu äijy tieduo da materjualua. “Elämän” uuzi projektu on suunnattu Priäžän piirin kylien ruadoloin kehittämizeh. Suuri projektu kannattau nelli kyliä — Nuožarven, Jessoilan, Pyhärven da Vieljärven.
— Nuožarves jo kodvan aigua pietäh Aleksandr Pavlovič Bugmirinan nimisty runoniekoin kilbua. Sidä aiven piettih Nuožarvel, se on ylen hyvä kilbu, dai runoloi rahvas kirjutetah ylen hyvii. Tänä vuon projektan mugah myö piemmö sen meijän keskuksen perustehel Priäžäs, kučummo arvostamah da nevvomah algajii runoniekkoi Karjalan kuulužii runoilijat Jelena Pieteläzen da Oleg Mošnikovan. Kilvan tuloksien mugah luajimmo kortit, kudamis rodieu Priäžän piirin luonnon kuvii da Aleksandr Bugmirinan da toinah kilbah yhtyjien runoloi, sanou Priäžän etnokeskuksen johtajan virras toimii Tatjana Seppänen.
Pyhärven aktivistan Ol’ga Zaharovan hyvyös on perustettu muzei. Sinne on kerätty karjalazien elaigah kuulujii ezinehii, enimät kuulutah XIX—XX luguloih, ga on vahnembaziigi. Kollektsii on ylen hyvä, ga pahakse mieldy, nämii harvinazii ezinehii suajah nähtä enimite vaiku Pyhärven eläjät. Etnokeskuksen ruadajat piätettih ozuttua muzein vehkehii Priäžäs.
Kaikkiedah rodieu kolme ozutteluu. Enzimäzes, kudai avavuu oraskuus, ozutetah ezinehii, kudamat kuuluttih karjalazile lapsile. Sygyzyl ozutetah naizien ruadoloi, naispuoleh kuulujii ruadobrujii, käziruadoloi da toizii. Kolmandes ozuttelus ezitetäh miespuoleh kuulujii ezinehii.
Jessoilas Valgien kodi -stuudien lapset luajitah mul’tfil’moi. Joga vuottu sie pietäh lapsien mul’tiplikatsien festivualii.
— Tavan muagah sidä festivualii piettih loittuopäi, tänä vuon projektan mugah piemmö sen paikan piäl. Myö kučummo festivualih mul’tistuudieloi Ven’an eri kolkispäi, ku tulolazet rahvas piettäs täs master-kluassoi, sanou Tatjana Seppänen.
Vieljärven Karjalan Kielen Koin tyves ruadajale teatrale Priäžän etnokeskus projektan mugah maksau matkan Anuksen piirih. Vie pluanois on painua Vieljärven teatran ozutelmien kogomus. Se roih hyvänny uudizennu ei vaiku vieljärveläzile, ga kogo Karjalan eläjilegi. Rahvashäi ainos prähkätäh mieldy valmehekse kirjutettuloin ozutelmien hädiä.
— Projektan tuloksekse rodieu konferensii kaikile, ket ruatah entokul’tuurizel alal, a myö, keskuksen ruadajat projektan varoih lähtemmö suamah uuttu neruo Leningruadan alovehen Kaikinon kyläh inkeroizien luokse, sanou Tatjana Seppänen.
Aihies voit lugie ven'aksegi.
