Priäžän piiris otettihes Karjalazien X kerähmön piätöksih
Syvyskuun lopus Petroskoil pietty Kerähmö da sen suuret kyzymykset työnytettih Priäžän kanzallistu piirii elavuttamah kanzoinvälizien da uskondollizien azieloin nevvoston jo ammuttavah hillennytty ruandua. Kerähmön deleguatat potakoittih piirin herrallistuo kerävymäh vereksel da yhtes kaččomah, midä karjalazien Kerähmös piätettih da midä voibi ruadua Priäžän piiris rezol’utsien todevattumizekse.
Ezmäzikse piätettih kehittiä oma piirin programmu vuozikse 2025-2027 da kannattua kielellizii da kul’tuurizii hommii omas piiris. Ruadojoukkoh ruvetah kuulumah rahvas Priäžäs, Jessoilas, Vieljärves da Pyhärvespäi –karjalazien liittoloin aktivistat, kylähallindoloin piälimäzet. Tuliel vastavundukerral talvikuul kačotah, kui opastetah karjalan kieldy piirin školis da päivykodilois mindäh sendäh sen luadu ylen huononi.
— Meijän Vieljärven kylä on toine kogo tazavallas karjalazien luguprotsentoin mugah jälles Tuuksen kyliä. Vuozikymmenii lapsien päivykois hozi vähäzin ga lapsii harjaitettih karjalan kieleh, nygöi jo kaksi vuottu sidä ruaduo ei pietä, eigo ken prižmi sidä päivykoin johtajal olgah libo älgäh olgah meijän piiri kanzalline da Vieljärvi karjalaine kylä, paheksi Kerähmön vallittuloin nevvostoh kuuluju vieljärveläine Natalja Antonova.
Nevvostolazen Tatjana Izotovan sanoin mugah, Priäžän piiris kahteskymmenes kahtes kyläs ei ole telefon-da internetyhtevytty – se jo täl vuozisual on suuri kummu.
Virrallizien tiedoloin mugah, Priäžän piiris viizi karjalan kielen opastajua suahah liževöidy yhten tuhanden rubl’an omah kuunpalkah. Istundon rahvas kačottih sidä ylen pienekse da ehoitettih tuliekse oppie suurendua sidä kannatustu.
Nevvoston ruandah yhtyttih Priäžän piirin administratsien piämies Dmitrii Bujevič da hänen uuzi varapiämies Jelena Vannik. Hyö käettih kui vai voijah kannattua nevvoston ruandua da auttua suaha hyväksyttäväkse uuzi etnokul’tuurine programmu.
— Olemmo ylbiet sit, ku meijän Priäžän piiri on kanzalline da meil on tärgei säilyttiä sen stuatussu, kohizi Dmitrii Bujevič.
