Priäžän joudoaijan da luomisruavon keskukseh 23. talvikuudu avattih Atmosfera-kinoteatru. Kul’tuuru-kanzallizen projektan mugah kinoteatrah azetettih nygyaigazet laittehet.
– Rahvahale kinozualu rodih mieldy myö, kaččojat pandih merkile hyvä iäni da kuva. Kinozualah kävyy äijy lastu, heidy ylen äijäl miellyttäy Zveropoi-2-mul’tfil’mu. Toivommo, ku Uvven Vuvven pruazniekkupäivinny kaččomah kinuo tulou vie enämbi rahvastu, sanelou Priäžän joudoaijan da luomisruavon keskuksen taidoilii-dekoruattoru Oles’a Delenskaja.
Priäžän kinozualan uvvistandah meni läs viitty mil’jounua rubl’ua. Abuden’gat andoi Ven’an Kinon fondu. Projektan mugah abuden’goi suannuzis kinoteatrois puoli fil’mois ozutetah Ven’an kinokuvii. Abuden’goi suajah pienet linnat, kudualois eläy ei enämbiä 500 000 hengie.
Kaikkiedah Kinon fondan hyvyös Petroskoih da Karjalan toizih čuppuloih avattih 18 kinoteatrua.