Prezidentan kadiettuopiston kazvatit oldih ”Etnokois” käymäs
Petroskoin kadiettuopiston 1. kursin opastujat käydih Petroskoin valdivonyliopiston ”Etnokodih”. Baltiekkumeren-suomelazen fololougien laitoksen vahnin opastai Anna Nazarova saneli lapsile ”Etnokoin” luadimizes da niilöis vahnois vehkehis, kudamii suau sie nähtä.
— Kadiettuopiston ruadajat iče kehoitettih moizien ekskursieloin piendiä. Tämän opastusvuvven aigah minä piin ”Etnokois” jo kolme mostu ekskursiedu seiččemenden da viijenden kluasoin opastujile. Lapset voijah tulla vaigu suovattoin, ku muut päivät hyö ollah kiini opastundas, sanoi Oma Mediale Anna Nazarova.
Kadietat tiijustettih, kui ven’akse da karjalakse sanottih ennevahnazii muanruadajan argielokseh pättävii vehkehii, kui niidy käytettih da mis azuttih. Lapsile mieleh oli tiijustua, ku tuohtu käytettih kodii nostajes, jallaččilois da astieloi luadijes, nuorii, val’l’ahuksii da elostuksii azujes.
Ekskursien lopus lapset kižattih. Heil pidi vallita pättävät sanat ymbäri olijoile vehkehile da sellittiä kui niidy käytettih. Mollembat kilbujoukot hyvin vastattih kyzymyksih, sendäh ku tarkah kuuneltih ekskursien aigah. Lapset äijän kyzyttih, tahtottih enämbän tiijustua karjalazien perindölöih nähte.
